Lětosne mytowanje Maćice/Maśice Serbskeje

W Nowem Casniku jo se južo wó pósćenju tśich mytow Maćice/Maśice Serbskeje rozpšawiło. Myto „Bogumiła Šwjele“ se póśěgujo na wuknice a wukniki Dolnoserbskego gymnaziuma, kenž su se ze serbskeju kulturu a/abo historiju we wobłuku wucby zaběrali a wó tom pisali, w nimskej abo serbskej rěcy. Lětosa jo se jadno źěło teke w pólskej rěcy zapódało, což jo snaź jano problem za pósuźowańsku komisiju był.

Myto „Bogumiła Šwjele” jo se wudobyła wuknica 12. lětnika Stella Kliemojc za jeje źěło „Die Wirtschaft der slawischen Siedlungen zwischen Elbe und Oder vom 6. bis zum 12. Jahrhundert”. Spěchowańske myto jo dostała Lucie Loichenojc ze samskego lětnika za swój pśinosk „Statkowanje Miny Witkojc w a mjazy swětowyma wójnoma”, kenž jo dopołnje w dobrej dolnoserbšćinje spisała.

Pśedsedaŕ Maśice Serbskeje jo šansu wužywał, jima pśed cełym seminarnym kursom „Regionalne stawizny” pód nawjedowanim ceptaŕki Angele Šurmanoweje wótpowědne myto pśepódaś. Pśi tej góźbje jo krotko rozkładł, kótare towaristwo Maśica Serbska jo a kak wóna statkujo. Rownocasnje jo sobu dožywił wuběrne zašćitowanje seminarnego źěła mytowaŕki Stellu Kliemojc pśed cełym kursom. Wóna jo na zakłaźe šěrokeje fachoweje literatury wustajiła, až jo urbanizacija našeje regiony pśez słowjańske rody, wósebnje Łužycanarjow, zakład twórił za pśichodnu wobsedleńsku strukturu. Pětk, 29. maja, buźo kněni Kliemojc swójo źěło we wobłuku głowneje zgromaźiny Maśice Serbskeje w Chóśebuzu prezentěrowaś.

Pśi mjaztym šestem wupisanju mytow smy dostali śěsć źěłow resp. procowanjow. To jo nowy record. Pśipad pak njejo, ale wuslědk wjelelětnego zgromadnego źěła Maśice a Serbskego instituta w personalnej uniji ze seminarnymi kursami na DSG. Teke zastupnik Dolnoserbskeje biblioteki w Serbskem domje jo nam južo wěcej razow ako póraźowaŕ fachoweje literatury k pomocy był.

dr. Pětš Šurman