Chorowe lěgwo jo cele wósebna forma wódychanja: se gromaźe wulětujoš, pśemało spiš a wjele spiwaš, až sebje wušy klinkaju! Teke lětosa jo se kóńc septembra zasej za 45 wobźělonych groniło:
kofery pakowaś, noty zatkaś a se pódaś do chorowego lěgwa w Pšynje (Missen) pla Wětošowa! Pśeto wjelike tšojenja pušćaju swóje smugi docasa - w pśiducem lěśe dajo ned dwójnu pśicynu za swěśenje:
Dolnoserbski gymnazij Chóśebuz swěśi swój 75. narodny źeń – a teke šulski chor swěśi swójo 75.wobstaśe. To se wě, až nichten njoco z kśiwym tonom wokoło rožka pśiś.
Mjazy probami jo se jědło, smjało a rozgranjało. A rowno how jo se zasej raz pokazała wjelicna pódpěra starjejšych a pśijaśelow chora. Wóni su se starali wó to, až nichten njejo zagłodnuł, až jododosća piśe było a až su wóstali spiwaŕki a spiwarje mjazy muzikaliskimi nejwušymi wugbaśami teke śělnje pśi mócach. Minjone lěta su to byli pśedewšym teke něgajšne cłonki chora, kenž su pódpěrowali wótběgi a wobstaranje na pěś probowych dnjach. Liam Herzbergojc, Emma Schreiterojc a Eric Bivour su se njewomucnje sobu starali. Wutšobny źěk teke wšyknym starjejšym, kótarež supomagali, su warili, pjakli a nakupowali!
Chorowe lěgwo pak njewobstoj jano z probami. Jo teke šansa, až zgromadnosć rosćo. Nowe cłonki wósebnje z 5. lětnika su se malsnje do choroweje familije pśiwzeli. A stare wuchace jim pokazuju, kak wšo wótběźe. Šulski chor ga jo wěcej ako jadna kupka ze cełkownje 54 wuknjecych, kótaraž zgromadnje spiwa - wón jo wutšoba kulturnego źěła na Dolnoserbskem gymnaziumje Chóśebuz. Pśi koncertach, šulskich zarědowanjach a wósebnych góźbach wjeźo wón luźi gromadu, dajo serbsku kulturu słyšaś a se wó to stara, až serbske tradicije žywe wóstanu.
Wjeršk chorowego lěgwa jo teke lětosa wuspěšne pśewjeźenje nazymskego koncerta njeźelu, 27.septembera w Pšynje było. Pśed wjelikim publikumom - wěcej ako 100 pśisłuchajucych - su se mógali južo znate ale teke rowno nazwucowane nowe spiwy pśedstajiś. Pód wuměłskim a pedagogiskim nawjedowanim Jennifera Dünnbieroweje, Geralda Schöna a pianista Lennarda Ramscheka smy dožywili zukowy nazymski koncert, kótaryž jo se z boka Załožby za serbski lud a Domowinu pódpěrał. A co ga był wustup bźez narodneje drastwy? Źěkowano pilnemu źěłoju šlodaŕki Antje Lehnitzkoweje su mógali lětosa wšykne źowća w pó źělach nowo wušywanych drastwachwustupiś. Na gluku ju mamy na šuli.
A gaž pón pśi jubileju na 4. septemberje 2027 wšykne zgromaźe na jawišću stoje a prědny zukzaznějo, buźo se pokazaś, za co su se dłujke probowe dny, pilna pódpěra starjejšych a sćerpnosć wuměłskich nawjedujucych zadanili. Wšako jo pó koncerśe do pśiducego koncerta.
(awtorka teksta Angela Šurmanowa)